Sa Catedrali de Santa Maria Assunta est in su centru stòricu de Aristanis, in ui ci fiat prima una ruga, comenti cunfirmant unus cantus tumbas de cussu perìodu scobertas a suta de su sagrau. Dd’aiant torrada a fai in stili romànicu in su 1130. De s’antiga crèsia bizantina c’est ancora calicuna cosa in su giardinu, inveci de cussa romànica abarrant dus parapetus de linna traballada mesu segaus in ui ci funt disegnaus leonis chi circant de aguantai is cerbus cun is ungas e su profeta Daniele in su fossu de is leonis. Fortzis sa crèsia romànica est stètia sciarrocada in unu assèdiu in su 1195 ma giai in su 1700, candu guvernaiat Marianu II, una parti fiat stètia assentada comenti provant is iscritzionis de is pichiadoris de brunzu de su portali de linna.
In su sèculu XVIII aint torrau a fai s’edifìciu ma no aiant tocau is tres capellas de sa navada centrali; in sa capella de “Su Remèdiu” c’est sa pedra de sa tumba de Filippo Mameli de su 1348 chi est su terminus ante quem po dda torrai a ponni a postu segundu su gustu gòticu-catalanu. In su centru de su presbitèriu, in ui c’est figurada s’Assuntzioni de sa Vèrgini fata dae Rapous, si podit biri sa figura de Sant’Archelau, patronu de sa citadi. A canta a sa crèsia c’est unu campanili bellu, solu, cun sa parti de bàsciu chi est de su ‘200.
Si pentzat ca in àterus tempus in sa Catedrali de Aristanis c’interraiant is famìglias giudicalis de Arborea ma is dominadoris bènnius a pustis ci ant bogau totus is tumbas.
Sito istituzionale